***
රැකියාවක් පතා පෞද්ගලික සමාගමකට අයැදුම් කරන ඔබ, දෙවන සම්මුඛ පරීක්ෂණය දක්වා සමත්වෙයි. නොබෝ දිනකින් ඔබේ ස්ථානය ස්ථිර කරන බව එහි ප්රධානියා ඔබට පවසයි. බොහෝ කලක් රැකියාවක් සොයමින් සිටි ඔබ, මෙම දැනුම්දීම ලැබෙන තෙක් දින ගනිමින් සිටියි. එහෙත් නොසිතූ පරිදි එම පුරප්පාඩුව වෙනකකුට ලබාදී ඇතිබව ඔබට දැනගන්නට ලබේ. දුරකථන ඇමතුම් ගණනාවකින් පසු අදාල ප්රධානියා ඔබගේ ඇමතුම භාරගනියි. ප්රසිද්ධියේ මෙය නොපවසන ලෙස පොරොන්දු කරගන්නා ඔහු, ඔබට මෙම අරුම පුදුම කථාව පවසයි:
එනම් පුරප්පාඩු පිරවීමට ආසන්න වී එක්තරා ප්රබල මන්ත්රීවරයකුගෙන් තම ආයතනයට ඇමතුමක් ලැබුන බවයි. නම් ලයිස්තුවක් සැපයූ ඔහු, 'මේ මට සෑහෙන උදව් කරපු අය. මෙයින් දෙන්නෙක් වත් ගන්න ඕනේ' යැයි කියා ඇත. ලයිස්තුව දෙස බැලූ ආයතන ප්රධානියාට පෙනී ගොස් ඇත්තේ එහි ඇති සියළු දෙනා මූලික සුදුසුකම්වත් නොමැති දේශපාලන ආධාරකරුවන් හෝ ඔවුන්ගේ ඥාතීන් බවයි. මෙවන් දෙයක් කිසිදා අත්දැක නොමැති ප්රධානියා වෙනත් ස්ථාන කිහිපයකින් විමසීම් කරයි. පුදුමයකි. ප්රධාන පෙළේ ආයතන ගණනාවකට මෙසේ ලයිස්තු ලැබී ඇත. ලයිස්තු ප්රතික්ෂේප කළ ඇතම් සමාගම් වල ආනයන / අපනයන බලපත් අහෝසි වූ බවත්, ඇතම් සමාගම් කරදරකාරී ආදායම් බදු විමර්ශන වලට බඳුන්වූ බවත් ඔහුට දැනගන්නට ලැබිණි. පාලක පක්ෂයේ කිසිවකු නොහඳුනන ප්රධානියා, බියට පත්ව පුරප්පාඩු දෙකක් ලයිස්තුවෙන් පුරවා ඇත. පොරොන්දු කඩකිරීමට සිදුවීම පිළිබඳව ඔහු සමාව අයැදියි. ඔබට නැවතත් මුල සිට රැකියාවක් සෙවීමට සිදුවේ.
